Karatay evkafından olan Karatay kariyyesine Türkmenlerin tecavüz ettiklerine dair belge

“Kayseriyye kadısına hüküm ki Samanto (Zamantı) kadısı Mevlana Hamza orduyu hümayunuma mektub gönderip kazai mezbura tabi sulehadan Karatayı evkafından olan Karatayı nam karyeyi her sene mahsul zamanında Türkman tayifesinden Şeref Kethüda ve Pir Kulu ve Bay Hoca ve Selim Koyun ve Güli Budak ve Hemdem ve Devlet ve İhtiyar Oğlu ve Küçük Mehmed hevasına tabi nice eşkıya ile gelüp basup ahali-i kariyyenin iki re’s at ve üç merkeb ve yirmi beş mud buğday ve sekiz re’s öküz ve iki incilü arakıye dört aded kemha kattan ve üç mikrame kuşak ve iki altun saçlık ve iki ferace ve iki incü gerdan ve sayir emval erzakların garet idüp külli teaddi eylediklerin arz etmeğin şer’ ile icrayı hak olunmak fermanım olmuştur. Buyurdum ki, vusul buldukta bu babda unat vechile mukayyed olup mezburları hapsi şedid ile ele getürüp dahi meclisi şer’e ihzar ve davayı hak ve tayini madde idüp alıverdikten sonra ehli fesad muhtacı arz olanlardan ise haps idüp arz eyleyesin.Değiller ise şer’ ile haklarında lazım geleni icra eyleyesin. Amma hak üzre olup celb sebebi ile ehli fesada himayetten ve kendi halinde olanlara garaz ve teaddi ile hilafı şer’i şerif zulüm ve teaddi olunmaktan hazer idüp caddel hakdan udul eylemiyesin. (Hüseyin Ağa mübaşir yazılmıştır. İmam efendi hattıyle) Fi 12 s 1019 [1]
[1] Ahmet Refik, Anadolu’da Türk Aşiretleri, İstanbul, 1989, s.61-62