[Şûrâ-yı Devlet Evrakı, Nu: 1796/16] Bâb-ı Alî Dâ’îre-î Umûr-ı Dâhiliye Mektûbî Kalemî Aded 1239 Huzûr-ı Âlî-î Hazret-î Sadâret Penâhiye Ma’rûz-ı çâker-î kemîneleridir ki Sarıoğlan ve Kuzugören ve Zamantı nâhiyeleri el-yevm merbût bulunduğu Aziziye kazâsı merkezine ba’îd olmak hasebiyle ahâlîsi tesviye-î mesâlihce dûçâr-ı müşkilât olmakda bulunduklarından mevki’an kaymakamlık teşkîline müsâ’id olan Sarımsaklı karyesinin kazâ ittihâzıyla nevâhî-î mezbûrenin oraya rapt ve ilhâkı hakkında ahâlî vekili Emin vesâ’ire imzâsıyla huzûr-ı âlî-î hazret Sadâret Penâhiyelerine keşîde olunup tevdî buyurulan telgrafnâme ile berâber takdîm kılınmış ve mezkûr Sarımsaklı Karyesi’in merkez ittihâzıyla ve nevâhî-î mezkûrenin ilhâkıyla müceddeden bir kaymakamlık teşkîlî ezh-er cihet münâsib olacağına da’ir bi’l-muhâbere Sivas Vilayeti Meclis İdâresinden cevâben tevârüd eden mazbatanın 21 mayıs sene 310 târihli tezkîre-î âcizânemle takdîm olunduğu kayden anlaşılmış olmasına nazaran icrâ-yı îcâbı bâbında emr ü ferman hazret-i veliyyü’l-emrindir. Fi 3 Muharrem sene [1] 312 Fi 25 Haziran sene [1] 310 Nâzır-ı Umûr-ı Dâhiliye Bende İmza [İrâde Dâhilîye, Nu: 1332.R./5] Bâb-ı Alî Dâhilîye Nezâreti İdâre-î Umumiye-î Dâhilîye Müdüriyeti Umum: 88294 Husûsî: 2061 Huzûr-ı Âlî-î Hazret-î Sadâret Penâhiye Hülâsa: Bünyan Kazâsı’nın Kayseriye’ye İlhâkına dâ’ir Ma’rûz-ı çâker-î kemîneleridir Sivas vilâyeti mülhakâtından Bünyan Kazâsı’nın idâreten, ticâreten Kayseriye ile alâka-î dâ’imesi ve mahall-î mezbûra kurbiyeti bulunduğu cihetle tahvîl-i irtibâtına Ankara Vilâyeti’nce lüzûm gösderilmiş ve Bünyan’ın Kayseriye ile münâsebât-ı ikdisâdiyesi Sivas’dan ziyâde olduğu Sivas Vilâyeti’nce de dahi beyan ve iş’âr kılınmış olmağla tahvîl-i irtibâtı hakkında tanzîm kılınan lâyihairâde-i seniyye hâzret-i Padişahî’ye iktirân etdirilmek üzere leffen takdîm olundu. İcrâ-yı icâbı menût-ı müsâ’ade-i aliye fehîmaneleridir. Ol bâbda emr ü fermân hazret-i veliyyü’l emrindir. Fi 3 Reb’ul-âhir sene [1] 332 Fi 16 şubat sene [1] 329 Dâhilîye Nâzırı bende (imza) [İrâde Dâhilîye, Nu: 1332.R./5] Bâb-ı Alî Dâhilîye Nezâreti İdâre-î Umumiye-î Dâhilîye Müdüriyeti Umum: ...... Husûsî: 3652 İrâde-î Seniyye Sivas vilâyeti mülhakâtından Bünyan Kazası, Kayseriye’ye rabt ve ilhâk edilmiştir. İş bu İrâde-î Seniyyenin icrâsına dâhiliye nâzırı me’murdur. Fi 6 Rebî’ul âhîr sene [1] 332 Fi 19 Şubat sene [1] 329
MEHMED REŞAD
Dâhilîye Nâzırı
Sadrazam
imza imza
Yorumlar
Yorum Gönder